चिंचोके

आन्याच्या ग्लास मधे जिमलेट होते.
माझा सिंगल माल्ट.
ग्लास उंचावुन 'चिअर्स' झाले.
आणि आन्या बोलता झाला.
दर दोन वर्षाने आन्या भारतात येतो.
अगदी न चुकता.
अमेरीकेत गेले २० वर्षे स्थायिक असलेला आन्या भारतातील सुट्टीच पसंद करतो.
अगदी कुटुंबासकट.
मोठी झालेली मुले सुद्धा अगदी निर्मळ मराठी बोलतात.
तसे आन्या काही फारसा हुशार विद्यार्थी नव्हता.
गंमत म्हणुन जी.आर.ई दिली.
चांगले मार्क मिळाले.
सातत्य बघुन स्कॉलरशिप सुद्धा मिळाली.
एम्.एस. करता अमेरीकेला गेला.
पोस्ट ग्रॅज्युएशन मधे मात्र चमकला.
सुट्टीत एक काम न चुकता तो करतो.
भारतातील विधायक काम करणार्‍या संस्थांची चौकशी करतो.
भेट देतो.
काम आवडले तर आपल्या वार्षिक उत्पन्नाचा ठराविक हिस्सा २ ते ३ सस्थांमधे विभागुन देतो.
"काय रे चो, तु कुठल्या विभागात सद्ध्या"
म्हणजे?
"श्रीमंत की उच्च मध्यम वर्गिय"?
अरे तु सिंगल माल्ट वर जाउ नकोस. ते केंव्हा तरी असते म्हणुन. आणि तु आहेस म्हणुन. नाही तर शक्य तो नाहीच.
मी उच्च आणि मध्यम च्या मधला. पण का रे?
"ह्या वर्षी जरा वेगळा अनुभव आला म्हणुन"
काय.
"रायगड मधील एका वृद्धाश्रमात गेलो होतो. चांगले व्यवस्थापन आहे. म्हातार्‍यांची चांगली काळजी घेतात. आई आणि बाबांनी नाव सुचवले म्हणुन गेलो होतो.पन्नास हजाराचा चेक दिला. मॅनेजर चे एक वाक्य कळाले नाही."
कुठले?
"अमेरीकन श्रीमंताना १२५० रुपये म्हणजे काहीच नाही"
हां, म्हणजे त्याने चलनाचे रुपांतर केले. तु त्याला प.न्ना.स. ह..जा..र असे ठणकावयचे होतेस.
"अरे, ते पैसे माझ्या मेहेनतीचे.त्या पैशाला अस क्षुद्र करणे योग्य नाही."
सोड रे. कुठल्या तरी झुरळाचे बोलणे काय मनावर घेतोस.विसरुन जा.
"मी अमेरीकेतला श्रीमंत नाही रे. तुझ्या सारखाच. तु रुपयात कमवतोस. खर्च करतोस. मी डॉलर मधे."
खुपच दुखावला गेलायस का? अरे तो मॅनेजर एका खास भोचक वर्गातला आहे. वाचाळ वीर. ही मंडळी सारखी बोलतात. टीका करतात. पण स्वतः काहीही करत नाहीत. पण मला एक सांग तु हे पैसे का देतोस? सामाजिक बांधिलकी,अपराधी पणाची भावना,कर्तव्य, देशाचे देणे ह्या हेडींग खाली.
"खरे म्हटले तर असला कुठलही प्रकार नाही. फक्त मला बरे वाटते म्हणुन."
मग सोड ना. जाउ दे. तु तुझे करत रहा.अशा भोचक मंडळी कडे फारशे लक्ष देउ नकोस.
नंतर सुमारे ३ तास गप्पा रंगल्या. बील आले.आन्या हॉटेल मधे माझ्या आधी १५ मिनिटे आला होता. त्याने कार्ड देउन बील मला भरायला लागणार नाही ची व्यवस्था केली होती. बील आल्यावर त्याने ५ डॉलर ची (बीलाच्या १५%)टीप दिली.
कीतीही बिल झाले तरी मी ५० रुपयांपेक्षा जास्त टीप देत नाही हे ऐकुन आन्या चकीत झाला.