चल पुन्हा आपुल्या देशी

चल पुन्हा आपुल्या देशी, चल पुन्हा आपुल्या देशी,
वाट पाहतो रस्ता जिथला, तशाच जिथल्या वेशी ॥ चल पुन्हा ...॥

वाट पाहते सकाळ तिथली तुझी चहाला,
काम थांबते जरा, सांग रे सांग कशाला?
क्षणोक्षणी तव भास वाहती, येत्या वार्‍यासरशी ॥ चल पुन्हा .. ॥

हरेक श्वासावरी काढते दृष्ट माउली
मिळते तुजला तिच्या प्रार्थनांचीच सावली,
चाहूल लागता तुझी, धावते ती रे दारापाशी ॥ चल पुन्हा... ॥

तिथे न तू, पण तिथेच तू रे त्यांच्यासाठी
इथेच तू, पण इथे न तू रे तुझ्याहिसाठी
क्षणात कितिदातरी मनाने जिकडे जाशी ॥ चल पुन्हा... ॥

करशिल सार्‍या पूर्ण अपेक्षा, त्यांच्या आशा ,
जाशिलही तू अजून दूरच्या परक्या देशा
पण मातीसुद्धा जिथली, तुजला वैभवराशी ॥
चल पुन्हा आपुल्या देशी, चल पुन्हा आपुल्या देशी॥