पनीर मसाला

र्रॉडधारी 'नळी'श्चंद्र बाबा आणी आफ्रिकन अर्धवट राव यांना फक्त आणी फक्त आणी फक्तच जळवायच्या उद्देशाने 'पनीर मसाला' ही पाककृती टाकण्यात येत आहे...... कॅलरी मोजणार्‍यानी बघितली नाही तरी चालेल....

साहित्य:

१. पनीर - पाव किलो - साधारण एक बाय एक इंचाचे तुकडे करून
२. एक मोठा कांदा - चिरून
३. दोन मध्यम टोमॅटो - चिरून
४. अर्धा-पाउण चमचा - लाल तिखट, कांदा लसूण मसाला, गरम मसाला
५. मीठ
६. तेल, हिंग, जिरे, कडीपत्ता, हिरवी मिरची - फोडणीसाठी
७. आलं लसूण पेस्ट
८. एक चमचा दही
९. दोन चमचे लोणी
१०. अर्धा चमचा हळद

कृती:

एका तव्यावर थोडंस तेल टाकून त्यावर पनीरचे तुकडे खरपूस तांबूस भाजून घ्या.

एका कढईत तेल तापवायला ठेवा. तेल गरम झालं की त्यात हिंग, जिरे, कडिपत्ता आणी २ बारीक चिरलेल्या हिरव्या मिरच्या फोडणीस टाका.
जिरे तडतडले की त्यात कांदा टाकून मस्त गुलाबी होईपर्यंत परता. मग त्यात टोमॅटो टाकून शिजे पर्यंत परता.
मिश्रण शिजलं की त्यात मीठ , हळद , आलं लसूण पेस्ट, लाल तिखट, कांदा लसूण मसाला, गरम मसाला घालून एकजीव करा.

आता त्यात शॅलो फ्राय केलेले पनीर टाका. अर्धी वाटी पाणी टाकून कढई झाका. तीन चार मिनीट मध्यम आचेवर उकळी येऊ द्या.
त्यात दीड चमचा लोणी आणी एक मोठा चमचा दही टाका. मिश्रण एकजीव करून अजून पाच मिनीटे उकळी येऊ द्या. तयार आहे मस्त चमचमीत पनीर मसाला....

सर्व्ह करताना वरून उरलेले अर्धा चमचा लोणी घाला आणी लुफ्त लुटा.....

राजे आणी अर्धवटरावांना टुक टुक...