संताचा केक

नमस्कार मित्रहो,
खालील पाककृती आहे एन्जेल (मराठी शब्द- संत??) चा केक, आणि अजून एक असतो तो सैतानाचा केक (डेव्हील्स फूड केक..)..
मी जेव्हा हे दोन्ही केक पाहीले तेव्हा मला वाटलं एन्जेल फूड केक पांढरा असतो म्हणून त्याला एन्जेल चा केक म्हणतात आणि डेव्हील्स फूड केक काळा (चॉकलेटचा) असतो म्हणून त्याला सैतानाचा केक म्हणतात पण खरं कारण असं आहे की एन्जेल फूड केक मध्ये कॅलरिज फार कमी असतात म्हणजे बटर/लोणी नसतं,तो फक्त अंड्याच्या पांढर्‍या बलकापासून बनतो आणि रंगालाही पांढरा असतो. सैतानाच्या केक मध्ये साहीत्य म्हणजे चॉकलेट्, बटर,मैदा म्हणजे भरपूर कॅलरिज....
तर आज संताचा केक पाहूया...

साहीत्यः
६ अंड्यांचा फक्त पांढरा बलक
३/४ कप पीठीसाखर
१/२ कप मैदा
२ चमचे वॅनिला अर्क
१/४ टीस्पू मीठ
२ टेस्पू लिंबाचा रस
१ टीस्पू लिंबाची किसलेली साल (ऐच्छीक)

ग्लेझिंगः

२ चमचे दही
२ चमचे मध
३ चमचे साखर
१ चमचा लिंबाचा रस

हे सगळं नीट घोटावे आणि थंड करून केकवर ओतावे.

कृती:

१) एका मोठ्या वाडग्यात अंड्याचा बलक घेऊन त्याला इलेक्ट्रिक रवीने किंवा व्हिस्कने पांढराशुभ्र फेस होइपर्यंत घुसळावे.
२) त्यात मीठ्,लिंबाचा रस, किसलेली साल आणि वॅनिला अर्क टाकून अजून २ मिनीटे घुसळावे.
३) आता पिठीसाखर घालून २-४ मिनीटे घुसळावे जेणेकरून स्टिफ पीक्स (मराठी शब्द??) तयार होतील.
४) ओव्हन ३५० डिग्री फॅ. ला प्रीहीट करून घ्या.
५) आता या मिश्रणात मैदा हळूहळून भुरभूरत चमच्याने हळूवार मिक्स करावा...
६) नॉनस्टीक पॅनमध्ये ३५-४० मिनीटे बेक करावा.
७) बेक झाल्यावर एखाद तास थंड होऊ द्यावा मग ग्लेझिंग टाकून सर्व्ह करावा.

टीपा: यात अंड्याचा बलक मैद्यापेक्षा जास्त प्रमाणात असल्याने काही लोकांना अंड्याचा वास येऊ शकतो, त्यासाठी वॅनिला अर्क जास्त टाकावा लागतो.
अंड्याचा बलक उगाचच जास्त घुसळू नये नाहीतर केक फुगत नाही.