स्वरालयीची दुनिया..३

एक संध्याकाळ.. दोन घोट घशात उतरवायचा टाइम!

एक देखणी शर्मिला टागोर आणि 'कुछ तो लोग कहेंगे..' हे तिला समजावणारा राजेश खन्ना..! पंचमदांचं संगीत, अप्रतिम गायकीची परिसीमा गाठणारे किशोरदा.. सगळंच भन्नाट, सगळंच शब्दातीत..!

घरवाली, धंदेवाली शर्मिला टागोर.. तिच्याच मोहल्यात राहणारा तिच्याच गावचा कुणी एक तिला म्हणतो..'बाई गं, मी सभ्य-सुसंस्कृत समजातला.. आपण एकमेकांना ओळखतो हे कुणाला न कळलेलंच बरं!'-- त्यामुळे दुखावली गेलेली शर्मिला..!

आणि..'तू कौन है, तेरा नाम है क्या? सीता भी यहा बदनाम हुई..' इतकं साधं-सोपं तत्त्वज्ञान सांगणारा काका राजेश खन्ना..!

गिटारच्या साहाय्याने दिली गेलेली सुंदर लय.. जीव ओवाळून टाकावा असे बासरीचे तुकडे.. 'छोडो बेकार की बातोंमे..' म्हणताना मस्तीत फेकून दिलेला किशोरदांचा स्वर, 'कही बीत न जाए रैना..' म्हणताना 'जाए' शब्दावरचा मोजका, सुंदर आलाप, 'रैना' शब्दावरचा जिवाला भिडणारा आलाप..! कमालीचा सुरेलपणा, गळ्यातला दर्द, शब्दोच्चार, अर्थानुरुप गाण्यातले भाव..! किशोरकुमार गांगुली..! हिंदी सिनेसृष्टीचं, भारतीय संगीताचं भाग्य!

कुछ तो लोग कहेंगे - अमरप्रेम! काय आणि किती लिहावं या गाण्याबद्दल?